Opnaemen film ’Daor klept de klokke weer’

Opsterland-Ooststellingwerf

Disse weke beginnen de opnaemen van de Stellingwarver film ’Daor klept de klokke weer’.

De film, die in et eerste plak bedoeld is veur et basis- en vervolgonderwies in Stellingwarf, zal mit mekeer zoe’n half ure duren gaon. Et verhael is baseerd op et gelieknaemige boek van H. Hoogeveen dat in 1959 verschenen is. Et vertelt et verhael van de periode dat Stellingwarf nao veul striederi’je zien vri’jhied veurgoed kwietraekte. Akteurs, figuraanten en techniek An de film doen flink wat speulders en figuraanten mit. Die meldeden heur nao een oproep in de kraanten daorveur an. De heufdrollen wo’n speuld deur Dirk Nijk (Wolvege), Lute Evert Wedekind (Berkoop), Emma Winter (Wolvege) en Evert Pultrum (Wolvege). Daornaost doen d’r uut tal van Stellingwarver dörpen figuraanten an, mar dot d’r bi’jglieks ok een inhuurde riddersploeg uut Kimswerd mit. Regisseur is Thomas Rovers uut Grunningen, et kamerawark wodt verzorgd deur David Koster (filmakedemie Amsterdam), eerste regieassistent is Marco Reekers, ok uut Amsterdam. Et geluud wodt verzorgd deur Serge Epskamp van Zaandhuzen, hi’j schrift ok de filmmeziek. De middelieuwse kleren bin ontwurpen en maekt deur Henrieke Kruse uut Grunningen, zi’j zorgt ok veur een tal illestraosies die in de film bruukt wodden. De technische ploeg krigt ondersteuning van o.e. Hendrik Betten, Jaap Elzenaar en Joke Brouwer. Veur et grimeerwark zorgen Kiena Bouwer, Baukje Oosting en Albertha Zwaagstra. De catering wodt verzorgd deur Gerrie Koopstra en Ineke Oudshoorn. Orvelte, kesteel, Delleboeren De verwaachting is dat alle scenes in acht daegen opneumen wodden kund. Tegere mit Hendrik Betten het Thomas Rovers de lekaosies uutzocht. Twie daegen zal d’r in et museumdörp Orvelte filmd wodden, omreden daor een boerderi’je, de Bruntingerhof, staot die nog uut de 16 e ieuw stamt. Butendat is d’r een middelieuwse sfeer in et dörp zels. Veerder wo’n alle opnaemen in de Stellingwarven maekt.  D’r wodt o.e. filmd bi’j de karke van Berkoop, in et kesteel Old Stoutenburg in Blesdieke, p ’e Delleboersterheide, in de Kaele Dunen, et Puntersbossien en bi’j de klokkestoel van Ni’jberkoop. Dat laeste is nog niet hielemaole wisse, omreden de klokkestoel krek varfd wodden zal. D’r lopt daoromme nog een verzuuk van de Stellingwarver Schrieversronte - de opdrachtgever van de film - om die klus een peer weken uut te stellen.

Auteur

Redactie